122 | COSERE სტრესის ეფექტური მართვისთვის, სასურველია შემდეგი რჩევების გათვალისწინება: • გამოიყენეთ შესვენების დრო, რათა დაისვენოთ როგორც ფიზიკურად, ისე გონებრივად. • დაიწყეთ სიარული სარეაბილიტაციო ან სპორტულ დაწესებულებაში. • რეგულარულად იფიქრეთ კითხვაზე, “რაზე და რატომ ვმუშაობ?”, რათა უკეთ გაიაზროთ თქვენი პერსონალური ღირებულებები, მოტივაცია და მიზნები. • მკაფიოდ განსაზღვრეთ პასუხისმგებლობები ორგანიზაციულ ჩარჩოებში, კონკრეტულ პირთა როლების დასადგენად. • ჩამოწერეთ სასიამოვნო სამუშაო აქტივობები და პრიორიტეტად აქციეთ მათი გამოყენება ყოველდღიურ რუტინაში. • იქონიეთ პოზიტიური ურთიერთობა ოჯახის წევრებთან, კოლეგებსა და ნაცნობებთან. • შეასრულეთ სამუშაო მხოლოდ კონკრეტულ საათებში და არ წაიღოთ სახლში. • ერთმანეთისგან განასხვავეთ შესაძლებლობები, მოთხოვნილებები და სურვილები. • ივარჯიშეთ რთულ სიტუაციაში თვითკონტროლისა და სიმშვიდის შენარჩუნებაში. • გამოხატეთ მადლიერება მოვლენების, ადამიანებისა და გარემოებების მიმართ. ეს სტრესის მართვაში დაგეხმარებათ. • მიიღეთ გადაწყვეტილებები ოპტიმიზმისა და რეალიზმის დაბალანსებით. • იქონიეთ საკუთარი თავის რწმენა და ნდობა, რომ მიაღწევთ მიზნებს და იქნებით წარმატებული. • იძინეთ დღე-ღამეში მინიმუმ ექვსი საათი. • იკვებეთ ჯანსაღად ზოგადი კეთილდღეობის მისაღწევად. სტრესის მართვის ერთ-ერთი ყველაზე ეფექტური სტრატეგია კოგნიტიური რესტრუქტურიზაციაა. აღნიშნული მიდგომის თანახმად, ადამიანი უნდა შეეცადოს, დაინახოს მოვლენები პოზიტიური კუთხით. ამის მისაღწევად, რეკომენდებულია ნეგატიურ მოვლენებზე ფიქრის მინიმუმამდე შემცირება, თუნდაც მცირე, მაგრამ პოზიტიური მომენტების აღნიშვნა და ცხოვრების დადებით ასპექტებზე ფოკუსირება. კოგნიტიური რესტრუქტურიზაციის გამოყენება შესაძლებელია სიბრაზის, შფოთვისა და სევდიანობის მომენტებში. აღნიშნული ტექნიკის დასატესტად შექმენით ცხრილი, რამდენიმე სვეტის მითითებით. პირველ სვეტში ჩამოწერეთ სიტუაციები, რომლებიც თქვენში ნეგატიურ განცდებს იწვევს. მეორე სვეტში აღწერეთ ემოციები, რომლებიც ასეთ სიტუაციებში გეუფლებათ, მაგრამ არ მიუთითოთ ფიქრები, რომლებიც იმ კონკრეტულ მომენტში მოგდით გონებაში. მაგალითად, „მან გააუფასურა ჩემი არგუმენტი კოლეგების თვალწინ“ არის ფიქრი, თუმცა მასთან ასოცირებული ემოცია შეიძლება იყოს ბრაზი ან იმედგაცრუება, რომელიც მეორე სვეტში უნდა მიუთითოთ. მესამე სვეტში მიუთითეთ თქვენი ფიქრები. წინა მაგალითიდან გამომდინარე, თქვენი აზრები შეიძლება იყოს შემდეგი: “ალბათ, ვერ გამოვავლინე კარგი ანალიზის უნარი” ან “შესაძლოა, სხვებმა უარყოფითად აღმიქვეს”. ასეთ ფიქრებს, “ცხელ-ცხელი” ფიქრები ეწოდება. ჩვენს ფიქრებზე ზემოქმედებით, შეგვიძლია შევცვალოთ ჩვენი ემოციები.
RkJQdWJsaXNoZXIy NzYwNDE=